ဘယ်လို ဟာသကြီးလဲ
အပေါ်ယံ အရေပြားဆန်မှုတွေက စျေးကြီးသလောက်
လူ့အသက်ကျ စျေးချိုတယ်
အာဏာမီးတောင်က မထင်ရင် မထင်သလို ထ ထ ပေါက်တယ်
ငါတို့ဟာ အာဏာမီးတောင်ဘေးက ရွာတွေပဲ
လူ ဖြစ်ရတာ တန်သလား
ရေခဲရိုက်ခံထားရတဲ့ ရှင်သန်ခြင်းတွေ
တံစို့ထိုး အကင်ခံထားရတဲ့ ဖြစ်တည်မှုတွေ
သွေးမြစ်ကြီးထဲ မရပ်မနား ကူးခတ်နေရခြင်းတွေ
အခု ဖြတ်သန်းနေရတဲ့ သန်းခေါင်က မိုက်တွင်းပိုနက်တယ်
အာရုဏ်ဦး ၊ နှလုံးသားချင်း ကူးမှလှတဲ့ လင်းပွင့်မှုတွေ
ရင်ထဲမှာလောင်နေတဲ့ မီးက အပူဆုံးပဲ
တောက်ခေါက်သံတွေဟာ ခေတ်ဆိုးစနစ်ဆိုးရဲ့ရော့ခ်ဂီတ
ကျစ်ကျစ်ပါအောင် ဆုပ်ထားတဲ့ လက်သီးတွေဟာ
လူ့အဖွဲ့အစည်းရဲ့ မက်တဖာ ခါးခါး
စိန်ထက်မာတဲ့ စိတ်ဓာတ်သားခမျှာ
မေတ္တာတရားနဲ့တွေ့တဲ့အခါ အရည်ပျော်ကျရရှာ
ဦးနှောက်နဲ့ ရွေးမိတဲ့ လမ်းက ရွံ့နွံတွေချည်းပဲ
နှလုံးသားနဲ့ လျှောက်မိတဲ့ လမ်းက ဆူးချွန်တွေချည်းပဲ
မမြဲခြင်းတရားဟာ ငါတို့ ရှုနေတဲ့ လေ
ပွဲတော်ထဲ စက်ရုပ်ဆန်ဆန် နွှဲပျော်ကြ
ပုထုဇဥ်အသားနဲ့ ထုထားတဲ့ ပန်းပုရုပ်တွေဆိုတော့ ထိလွယ်ရှလွယ်
သတိ ၊ ကျကွဲလွယ်သည် ပုံ/နိုင်ငံရေး
သစ္စာတရားထက် မွှေးတဲ့ပန်း ကို တွေ့ဖူးပါသလား
အိပ်မက်ကို ဒီအတိုင်းပစ်ထားတာတောင် အပင်ထပေါက်တယ်
အခိုးခံလိုက်ရတဲ့ ဒီမိုးက ရေစီးသံလေး
လူသားပီသစွာ နေခွင့်ရခဲ့တဲ့ နှစ်ကာလလေး ၊ လွမ်းဖွယ်
AK-47 နဲ့မှ မဟုတ်ဘူး
တံတွေး နဲ့ ထွေးရင်လည်း သေတယ်
အိမ်ပြန်ချင်စိတ်ဟာ အိမ်မရှိတော့တဲ့ အိမ်ဖြစ်သွားတယ်
မိသားစုဟာ အစိပ်စိပ်အမွှာမွှာ ပြန့်ကျဲသွားတယ်
ရှင်လျှက်နဲ့ သေဆုံးနေသူတွေ ရဲ့အပုပ်နံ့
သမိုင်းတရားခံဟာ သူ့နိုင်ငံနဲ့ သူ့ကိုယ်သူ နေ့စဥ် လုပ်ကြံတယ်
လူငယ်ဆိုတာ အမှန်တရားနဲ့ ပတ်သတ်ရင်
ကျောက်ဒိုးကိုလည်း လောက်စာလုံးနဲ့ ယှဥ်ပေါက်ရဲသူ
ဘယ်လောက်အထိ မှောင်ဦးမလဲ
အာဏာပိုက်ကွန်ထဲက ရုန်းထွက် လွတ်မြောက်
တောက်ပနေကြတဲ့ ကြယ်တွေ
လင်းလက်တာရာ
2025
