ဘယ်လို စ မိမှန်း မသိ
မဆုံးတော့ဘူး လို့
ဘဝကို ပင်ပန်းတကြီး ထမ်းထားတဲ့ ခရီးသွားတစ်ယောက်က ပြောတယ်
မြေအောက်ခန်းထဲ ပိတ်မိနေတဲ့
တိမ်တွေခမျှာလည်း
အိမ်ပြန်ချင်ရှာမှာပဲ
အလွဲတကာ့ အလွဲထဲမှာ
ချစ်ခြင်းမေတ္တာနဲ့ လွဲတာ အနာဆုံးလို့
လေထဲမှာ လွင့်နေတဲ့ ကျောက်တုံးတွေက
ပြောတယ်
ရေမကူးတတ်တော့တဲ့ ငါးကလေးဟာ
ကြယ်ငါးပွင့်ဟိုတယ် ကနေ
ကြယ်တွေရှိရာ ခုန်ချသွားတယ်
တခြားအရပ်မှာ
ကျည်ဆံရထားတွေ ခုတ်မောင်းနေချိန်
ကျုပ်တို့ဆီမှာတော့
ကျည်ဆံတွေပဲ ခုတ်မောင်းနေတယ်လို့
ကျည်ဆံရာတွေဗရပွနဲ့ ကျေးတောရွာလေးက ပြောတယ်
လူတန်းစား မခွဲခြားတာ
သေခြင်းတရားနဲ့ မျက်ရည်ပဲ
ဟော့ဒီ လောကမျက်မည်းကြီးထဲ
မုဆိုးလည်း သားကောင်
သားကောင်လည်း မုဆိုး
အာဏာကအစ ဘာမှ အစိုးမရ
မြေပုံညွှန်းအတိုင်း
မြေပုံလေး အဖြစ်သာ ကျန်ရစ်ကြရမယ့်
နိဂုံးတွေ
လင်းလက်တာရာ
